Раиси Вилояти Мухтори Кӯҳистони Бадахшон Ёдгор Файзов ва шаҳрдори шаҳри Хоруғ Кишвар Шамирӣ дар боғи фарҳангӣ - фароғатии шаҳр 12 - умин фестивали байналмилалии "Боми Ҷаҳон"- ро ифтитоҳ намуданд.

Сараввал, меҳмонон ва ҷамъомадагонро раиси шаҳр Кишвар Шамирӣ ба маркази вилоят хайри мақдам гуфта, изҳор дошт, ки маҳз бо сиёсати хирадмандона ва дурбинонаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳазорҳо сайёҳону меҳмонон аз мавзеҳои тамошобоби шаҳри Хоруғ ва дигар ноҳияҳои вилоят дидан намуда, бо расму русум ва анъанаҳои миллии мардуми мо аз наздик шинос мешаванд:

 "Ба туфайли баргузории чунин чорабиниҳои фарҳангӣ дустиву рафоқат миёни халқҳои гуногуни олам тақвият ёфта, феълан Тоҷикистони моро таҳти сарварии Пешвои муаззами миллат муҳтарам Эмомалӣ Раҳмон дар арсаи дунё ҳамчун кишвари соҳибистиқлолу биҳиштосо, меҳрофар ва дорои тамаддуни бостонии башарӣ мешиносанд", - мегӯяд Кишвар Шамирӣ.

Ба қавли раиси ВМКБ Ёдгор Файзов маҳз соҳибистиқлолӣ имконият дод, ки Ҷумҳурии Тоҷикистон мизбони чандин чорабиниҳои сатҳи байналмилалӣ гардида, ҳар яке аз онҳо самараи азимеро ба бор оварда истодааст. Мисоле оне, ки таи чанд соли охир роҳбарону намоядагони кишварҳои ҷаҳон, сарварони ташкилотҳои бонуфузи дунё хосса ба маркази ҷумҳурӣ, шаҳри Душанбе ва инчунин ВМКБ ташриф оварда, аз дидорбинии мавзеҳои гуногуни мамлакат таассуроти зиёд бардоштанд ва ҳамаи ин самараи меҳваи шаҳдбори Ваҳдати комили миллӣ ва Истиқлолияти давлатии кишварамон аст.

Мавриди зикр аст, ки инчунин дар рӯзҳои баргузории фестивал намоиши молу маҳсулот ва ҳунарҳои мардумӣ ба маърази тамошою савдо гузошта шуда, маҳсулоти зиёдро сокинони мамлакат ва меҳмонон бо нархҳои дастрасу арзон харидорӣ мекунанд.

Хадамоти матбуоти

раиси шаҳри Хоруғ